NDANG ADONG NA SO TARPATUPA DEBATA ( Lukas 1:37 )

 

NDANG ADONG NA SO TARPATUPA DEBATA ( Lukas 1:37 

Adong ma sahalak pelayar na margoar si Leo Nardo, si Leo Nardo on terkenal do alani hasabaron na dohot habisuhonna, attar hira na ganteng do muse halak ni on. Di sada tingki naeng marlayar ma nasida tu daerah Tiongkok. Torop do halak na rap dohot ibana di bagasan parau i. Dung borhat ma parau i, las situtu ma roha ni akka halak na adong disi. Alai dung di tonga-tonga pardalanan i nasida, tompu ma ro galumbang na tung mansai gogo, na mambahen maol situtu di arahon nasida parau nai. Mabiar do saluhut halak na dibagasan parau i ala ni galumbang i.

 Dung diida si Leo Nardo i arah ni parau na binoan nai,  ndang tu arah Tiongkok, alai gabe tu luat naasing digoari ma i, luat  “Kanibal” manang molo dilapati tu hata Batak didok mai “siallang jolma”. Dung di boto angka halak na di bagasan parau i ma na  salah dalan do parau nasida i, gabe lam tamba do biar nasida sude. Didok halak na torop i ma tu si Leo Nardo on, “boha nama ujung ni pardalanan ta on kapten nami?” huhut marungut-ungut ma nasida sude pangisi ni parau i.

Alai, aha ma di dok si Leo Nardo i tu nasida? Didok ibana ma, unang ma sai marungut-ungut hamu, jala unang mabiar hamu. Urupi hamu ma ahu laho paturehon layar ni parau on, asa boi muse marbalik tu luat na naeng si topothon on ta i. Dung didok ibana songon i, ro ma piga-piga halak laho mangurupi ibana, alai na piga-piga halak nai dang olo mangurupi jala didok na deba i ma, “boha do bahenonta laho paturehon layar ni parau on ai alogo pe so adong mangullus,  holan galumbang do na taida adong dison, jadi ndang adong lapatanna ta pature i”. huhut ma diparengkeli ibana. Na deba adong do mandok, “nga pos be roha nami kapten nami molo tung pe ikkon mate hami di tonga ni laut on.

Di na binege nai akka ungut-ungut i, di togihon si Leo Nardo i ma saluhut halak na di bagasan parau i martangiang “Ale Amanami”. Ndung sidung nasida martangiang, lam pos ma roha ni si Leo Nardo i na ikkon paluaon ni Debata do nasida sian akka parmaraan dohot pangunjunan i. Alana di bagasan tangiang Ale Amanami i pe, adong do hata na mandok “unang ma togihon hami tu pangunjunan, palua ma hami sian pangago”.

Jadi lam semangat ma ibana dohot akka halak na deba na olo mangurupi ibana i laho paturehon layar ni parau i. Ndung i, diputar ma parau i gabe boi ma marbalik arah muse  tu Tiongkok. Las situtu ma roha nasida be, huhut  mandok mauliate do saluhut halak natorop i tu Debata, ala nga di palua nasida sian parmaraan i. Gabe dohot ma porsea halak na deba nakkin na so olo  mangurupi i, jala didok nasida do “ai ndang adong hape na so tarpatupa ni Debata”.