Heber 12:18-29 Parhalado halomoan mardongan biar dohot hadaulaton " LETARE

SERMON JAMITA TU MINGGU  “LETARE”  15 MARET 2015

KONVENT PANGULA NA GOK TINGKI DISTRIK  X  MEDAN- ACEH, DI HKBP MEDAN DENAI , RESS: SUKARAMAI ,

SENIN 9 MARET 2015

EV:HEBER 12:18-29

 

Parhalado halomoan mardongan biar dohot hadaulaton

I. Patujolo

Ia Surat Heber on di tujuhon tu halak Kristen Jahudi na di bagasan haporsuhon hinorhon ni pangaleleion alani haporseaon  taringot tu Jesus Kristus. Torop do halak Kristen na ganggu uju i marhaporseaon. Surat Heber on ma patoranghon ia Jesus Kristus i ima Debata na gabe jolma , tumimbo sian angka malim ro di angka surusuruan. Ibana do dalan laho padomuhon Padan na robi dohot Padan na imbaru, padomuhon  parsaoran nadenggan maradophon Debata.( 1:1-2;2;2-3) Jala turpuk on ima sada pangajarion na manosoi dohot na pa ingothon Halak Kristen i asa mangolu di bagasan pangoloion, halomoan dohot biar mida Jahowa mardongan hadaulaton ( Beribadah dengan hormat dan takut pada Tuhan ) mangulahon hasintongan hadameon nang habadiaon dibagasaan parugamoon na sintong.

II. Hatorangan

Ayat 18-21  Ayat on patuduhon kilas balik di dolok Sinai. Dung haruar bangso i sian habuangan Misir di pudun Debata ma PadanNa dohot Israel marhite Patik na sampulu i . Andorang so nangkok si Musa tu dolok i tangkas do di pa andar sotung adong sian nasida na jumonok dohot manjama dolok i sotung mate nasida. Mangihuthon 5 Musa 4:11 digombarhon do dolok i songon api namarsigorgor dibagasan api sahat ro di parsitongaan ni langit, masa ma disi parhobot ni ombun dohot haholomon marimpotimpot , dung i pe asa ro ma hata ni Jahowa di tongatonga ni api. Di ayat 20 didok  molo dais dorbia tu dolok ingkon mate doi dangguran . I ma patuduhon paboa na mansai songkal do Debata jala badia  ala ni i do mansai mabiar nasida pola didok ; unang pola manghuling Debata  sotung mate hami.  Alani aha? ala ni dosa ni bangso i na mangaramuni dirina marhite angka ragam ni dosa na ni ulana. Holan si Musa do na hea adop bohi dohot Debata dungkon ni i dang adong be, marhite i ma di pangidohon bangso i ma si Musa gabe perantara nasida dohot Debata.  Gariada tahe si Musa pe tahutan jala angka dotdot do alani hasongkalon dohot habadiaon ni Debata . Songon i ma gombaran ni halak na mardosa na ro tu Debata sai di gohi biar do “Betapa kudusnya Allah , dan kekudusanNya membuat orang berdosa ketakutan”.

Ayat 22-25 Dolok Sion ima Huta ni Debata, simbol haluaon marhitehite Jesus Kristus tu saluhut manisia ( Pslm 50:2, Jes 2:3)  tu si ma hita di jou mamuji, marsaor rap dohot Debata . Jesus naung mamuhai parpadanan na imbaru,  paulakhon parsaoran naung sanga sego i, Ibana ma malim na rimpas jala pelean na rimpas. Ibana do mula ni Huria i,  na manguhumi halak partigor dohot na jahat . Marhite Ibana gabe dapot hita haluaon i  gabe boi hita jumonok muse tu Debata .Marhite mudarNa na durus mangungkap pardenggananta dohot Debata.  Dibagasan Tuhan Jesus lam solhot hita muse tu Debata. Marhite Jesus  ditobus hita sian hamatean i , di roro hita sian huaso ni sibolis laos gabe parjambar hita di hangoluan na so ra suda.  Alani i dang ringkot be hita mabiar ro mandapothon Debata tu Dolok Sion ( Tu bagas Joro-Na ). Ta argahon ma panjouon ni Tuhanta i, unang ta jua jala ta tundalhon be Ibana.

Ayat  25-29 Uhumon-Na do angka na na manulak Ibana, ta bege jala ta tangihon ma soaraNa. Na ro ma angka ari sogot di paruhuman i , salpu do sogot portibi on ro ma na imbaru ( Pslm 77:19, Hag 2:6 ) halak na manahan i ma angka na porsea di Debata dohot di Jesus Kristus . Halak na mangolu dibagasan Haporseaon dohot habadiaon manjalo tumpal HarajaonNa   jala sampang tu  hangoluan saleleng nileleng na ( Dan 7:18,27). Tama ma hita mandok mauliate tu Debata ( 1 Tes 5:18) jala mambahen ngolunta nahen pelean na hinalomohon ni Debata .  Gabe Parhalado na halomoan jala na mabiar dohot na marhadaulaton  ma hita  manghobasi ulaon ni Tuhan i. I ma ibadah na hinalomohon ni Debata ( Rom 12:1, Fil 4:18) . Api na mangallang do Debatanta i ( Debata Parlulu, Allah yang cemburu 5 Musa 4:24) marlapatan unang ta jua Debata , dohot Jesus Kristus,  holan  tu Ibana ma hita marsomba, unang ta olo i be sibolis laho manegai parsaoranta naung denggan i.

III. Impola tu Jamita

1.     Ro ma hita tu Sion , tatopot ma Bagas joro ni Debata nabadia i,  mamuji marsaor rap hon Debata dibagasan habadiaon.  Ai nabadia jala na songkal do Debata tama  hita mangolu dibagasan habadiaon . Jesus Kristus do pardomuanta dohot Debata.

2.     Ta argahon ma Panjouon ni Tuhan Jesus Kristus, tung unang adong sian hita na manjua asa parsidohot hita di HarajaonNa.

3.     Mandok mauliate ma hita tu Debata jala mamuji Ibana sian roha na ias jala marsitututu dibagasan roha biar mardongan hadaulaton asa gabe parhalado dohot ruas na hi nalomohonNa hita.

4.     Halak Kristen ingkon do marsihohot di angka sitaonon dohot parungkilon na, tongtong di bagasan las ni roha alani panghirimon na pinasahat ni Debata marhite Tuhan Jesus Kristus di sude angka na manghaporsea i Ibana

5.     Letare “Marlas ni roha ma hamu” dibagasan Jesus do singkop las ni rohanta , antong Beribadah ma hita holan tu na pasonanghon roha ni Debata, unang ibadah na holan pasonanghon dirinta sandiri . Ibadah ta, i ma ibadah na dibagasan biar mida Jahowa, alai barani jala gok las ni roha mangasahon asi ni roha ni Tuhan Jesus. Amen

Pdt Budianto Sianturi

HKBP Wahidin Baru