Mangido asa
unang daratinggion
Lukas
11:13: Gari hamu, angka na jahat i, umboto mangalehon na denggan tu angka
anakkonmuna, lam so lehonon ni Ama i sian banua ginjang Tondi Parbadia tu angka
na mangido i sian Ibana?
DI iklan sigaret Jarum: ro do jin manungkun sahalak ama: “Kuberi
satu permintaan!” Ro ma ama i mangalusi: “Saya takut kepada istriku. Buatlah
agar istriku tunduk padaku!” Hape di tingki na manungkun i, di sampingna do
inantana. Ro ma inanta i, dipanotnoti ma jin nangkin. “Wong aku ae wedi!” Ninna
Jin nangkin. Lapatanna: “Sagari au pe mabiar do tu nyonyam!”
Na naeng idaonta sian iklan on, ndang na Jin i, alai amanta i
do, i ma taringot tu na pinangidona. Asal dilehon ma kesempatan mangido ba
memang lomo ni na mangido do. Nang pe sabalikna manangna dilehon manangna
ndaong, ba lomo ni na mangalehon do.
Jala na naeng itataringoti ndang na taringot tu penindasan. Ai
molo didok tertekan do umumna ina ni halak Batak binahen ni ama ni halak Batak,
toho do i, tahe? Adong do memang di huta ni parhuta, rap tu hauma do
amanta dohot inanta. Rap marbabo. Rap mulak. Holan i, dung dijabu, mangalompa
dope inanta i, amanta martapian. Inanta dope na manghobasi parmanganan. Jala
lompan pe gumodang ma di amanta i. Dung i, borhat ma amanta tu lapo!
Marsogotna, parjolo do inanta dungo manghobasi bohal siboanon tu balian.
Alai adong do tong amanta na mabiar tu inanta. Ala ni aha ma i,
ate? Na garang do inanta i? Ala ni boru ni mora, do? Ala umbalga do boan-boan
ni inanta sian amanta di panjaean baru marumatangga? Holan naeng mangalo
amanta, ro muse inanta mandok: “Aha? Na naeng hona lompit do ho, huroha!”
Mungkin sai adong do justru suami na tertekan, ndang inanta, alai antar jarang
do i, ate. Gumodang do ina na tertekan! Boha do di masa saonari? Ndang masa be
angka penindasdan di tonga-tonga ni rumatangga, ate!
Marhite turpuk sadarion, disungguli do hita, paboa
sitangianghonon ni halak Kristen ndada holan na ringkot tu pardagingon sambing,
alai dohot ma nang mangido na ringkot di partondion. Pinangido ma asa ro Tondi
ni Tuhanta mangajar-ajari dohot manogu-nogu hita. Pinangido ma asa lamu burju
diriniba na mardongan. Asa lamu tahan diri iba, ndang mura-mura dara tinggion.
Asa lamu malo manganju, unang sai holan na dianju. Asa malo mangajar dakdanak.
Asa buas marbasa-basa. Asa lamu maringgas ni roha din a mandohot par-Koor-an,
mandohoti parsermonan, mandohoti angka punguan, mandohoti angka kegiatan…..
Pdt Maurikson Silitongan
MTh
Tidak ada komentar:
Posting Komentar