Jamita Minggu 1 Desember 2013, Advent I, Jesaya 2:1-5

Jamita Minggu 1 Desember 2013, Advent I, Jesaya 2:1-5

Jamita  Minggu Advent  I, 1 Desember 2013

Jesaya 2:1-5

NARO DO IBANA SONGON PANGUHUM LAHO MANGUHUMI SUDE BANGSO

Digurithon : Budianto Sianturi

Pamuhai

Dinasahali di sungkun sada ina naposo ma sahalak ina natuatua, naung marumur 80 taon ,  didok disungkunsungkunnai, ai marlaba do pe ho inong na tu garejai? Boasa dohonon mu songoni ninna inanta natuatua, ai so dibege inong be jamitai, ai soboi be dijahaho buku ende dohot bibeli apalagi ma jamitai soboi be ra dibege ho ninna; lambok do inanta natuatuai mangalusi, mansai marlaba dope inang ahu na tugarejai, sarupa ma nuaeng ahu tu sada halak na manunsi paheanna, las boha pe dibahen mamoro ( mambilas abitnai) alai jumpa manjomurhonsa sai adong do tading aek nai di paheani , songoni ma nang ahu nang pe so tangkas be huida jala sohubege angka ende tarlumobima Jamitai alai sai adongdoi na tading dibagasan rohangku ninna inantai mangalusi, alani do binsan boi dope hudalani huharinggashon manopot bagas joroi. Mansai marguna do hape na ro manopot bagas joroi, ndadan songon ni deba halak, sarupa do na marminggu dohot na so marminggu asalma porsea di Tuhani. Antong tatangkasi ma turpuk sadarion

Panorangion

Jesaya : Jahowa do hatuaonku ( Allah adalah Keselamatanku ) manoarahon uhuman, sekaligus dohot bagabaga ni Debata tu Bangso Israel na tarbuangi, nang pe boha hansit ni panosak ningolu naeng ingkon nangkok dolok habadiaon ni Jahowa. Marpungu di dolok ni Jahowa manghalashon haroroNa. Asa lam tang Jolmai mangadopi ragam ni angka haporsuhon, angka roha na magopu dipargogoi, suang songon bangso Israel naung marhamamago alani habuangani nuaeng di palumba naroma Panurirangon taringot tu hamuliaon ni Harajaon ni Debata sogot ( Haroro ni Mesias si Paluai Ayat 1-5)   Asalma marsihohot nasida somubauba marhaporseaon tu Debata, maninggalhon hasomalan mangulahon hajahaton, marsomba tugana-ganaan asa unang tarrimas Debata. Ai Torus do mangula Debata paluahon bangsoNa Ayat 2 : Dang dilengsehon Debata bangsoi alai disege, dipapita do haporseaonnasida, nang pe di uhum, dalan laho padasiphon haporseaon nasida doi. Patupaon ni Debata do sada tingki naimbaru ima marhite napajongjonghon bagas joroNa di Jerusalem. Naboi idaon ni sude bangso di inganan na timbo marlapatan ndanda holan bangso Israel be na boi marnidai alai sandok houm, marga, huta nang bangso tahe. Ai Jesus Raja ni Huriai mangalehon sada kepastian paboa na hot do Huria ni Debata Salelenglelengna.

Ahado Bagasjoroi, Bagas joro ima sada tanda manang gombaron na mian do Jahowa, Debatanasida di tongatonga ni halak Israel dohot Juda, jala di bagas joro i do marsaringar dia do hata na dihatahon ni Jahowa jala na naeng diulahon bangso i.Bagas joro ima gombaran ni hamuliaon ni Jahowa, jala di bagas joro on mambahen jolma i martoruk ni roha marnida hamuliao ni Jahowa di bagas joro i jala on ma na boi mambahen jolma i mananda pangalaoisonna tu Jahowa diuduti manopoti pangalaosionna, jala on ma na manguduti roha na biar mida Jahowa.Bagas joro ima tanda ni padan ni Jahowa tu bangsoNa, na di bagasanna do dibaen poti parpadanan na marisihon 2 batu na marsurathon 10 hata ni Jahowa.Bagas Joro ima inganan parpunguan ni halak na porsea tu Jahowa. marhite parpunguan on dipatupa do panombaion marhite ende dohot ende pujipujian. Di Gereja kita Berbakti, dimasyarakat kita mengabdi dan bersaksi. Ingkon Pangkeonta ma bagas joroi inganan pamujion tu Debata, haroroan ni dame doi, Inganan nabadia Bagas joro boi do gabe inganan ni halak marsaor manangihon pangajarion ni tona manang hata ni Jahowa jala pasada tahi dohot gogo laho mangulahon hata ni Jahowa djala manghatahon na ringkot di taringot huta manang bangso i.

Masibetabetaan Manjalo pangajarion sian Debata “ Beta hita managnangkohi dolok ni Jahowa” manggombarhon hasadaon ni bangsoi tongon di ari haluaon i, alani binsan sadihari dope mansai ringkot manjalo pangajarion sian Debata dohot mangulahon lomo nirohaNa andorang so ro ari ni Tuhani. Songn Huria hita ingkon ma masibetabetaan laho mamuji Tuhantai, mangarahon angka dongan “ Boansadanari” masibetabetaan mangulahon Dame, songon Jesus siboan damei, manungguli hata ni Debata, dohot mangajarhonsa asa unang Uhum sogot di arini Tuhani

Alai di na masa di parsaoran siap ari justru marbalik sian na tinonahon ni Jahowa. jotjot do nasida mangulahon ulaon hadaulaton, alai parangenasida ndang suman tu na nihatahon ni Jahowa . Di tonga na masa i, Jesaya mandapot pangungkapon taringot hahaojak ni Bagas ni Jahowa na so dibaen ni tangan ni jolma. Alai Jahowa sandiri do na patupahon saluhutna i.

masibetabetaan do. “Beta hita,” ninna. Na marlapatan ma i, ndang adong sian nasida na holan mangihutihut, ( Songon nidok ni hata Batak: Eme namasak digagat ursa, iai namasa ima taula) alai ingkon dibagasan parsitutuon Jala jumpang  disi sude giot ni roha laho borhat. Dung i ndang asal borhat jala mardalan di dalan na so martujuan, alai diboto be do sidapothononna.

“Jadi manguhum ma Ibana di tongatonga ni angka parbegu, jala toruanNa torop angka bangso. Jadi patopahonon nasida ma podangnasida bahen gigi, jala hujurnasida bahen angka sasabi; ndang be sintahon ni bangso dompak bangso podang i jala ndang be guruhonon nasida parmusuon.” “Manguhum ma Ibana di tongatonga ni angka parbegu,” tumingkos, “Ibana gabe panguhum di tongatonga ni angka bangso.” Songon panguhum na tigor, uhumanNa ma angka bangso, adilanNa nasida taringot tu na piningkiran dohot na niulana be. Deba sian ulaon ni panguhum, i ma na mambuat haputusan taringot tu angka parsalisian, paujunghon parkaro jala pajongjonghon hadameon. Songon i ma didok dison, pajongjongon ni Jahowa, Debata ni si Jakob i do hadameon di tongatonga ni angka bangso. Ndang masa be porang, jala ndang adong be hasea ni podang dohot hujur songon ulaula tu hamusuon. Haoojak ni Baga Joro ni Jahowa on ima sada ulaon hadameon, hasonangan, dohot las ni roha di bangso i mian di Bagas ni Jahowa.. Debata ma na jongjong gabe Hakim na adil dinasida, jala ganup halak manjalo nahombar tu naniulana be, dang adong disi na memerengmereng bohi. Ndang adongbe sigogobotohon, ndang adong namarlomolomo, dang adong porang , ai nunga margantibe angka alat alat porangi gabe alatalat pertanian, Sude ikkon mardame sonang manghapadothon ulaonna be , unang adong na berpangku tangan jala ringgasma mulaulaon

Beta hamu, ale pinompar ni si Jakob! Mardalani ma hita di hatiuron ni Jahowa.” Joujou ni si Jesaya i do on tu halak Juda. Nasida do haroroan ni haluaon i, sian nasida taripar hatiuron tu saluhut bangso. Alai na boi masa do, malua bangso na asing, mago ia nasida; marrongoman halak sileban tu hatiuron ni Jahowa, tinggal di haholomon ia nasida. Sai unang ma masa na songon i. Hombar tusi ma dijouhon si Jesaya dison, asa mardalani nang nasida di hatiuron ni Jahowa, lapatanna mangolu hombar tu patik ni Debata. Ndang dia imbarna di halak Juda dohot na leban, na mardalan di hatiuron ni Jahowa mangolu, alai na tinggal di haholomon rap mago do i.

Sipahusoron

Gabe Pardame ma hita songon Ibana sipardamei, Taharinggashon ma Tu Gareja jala taradotima “Mardalani dibagasan Hatiuron ni Jahowa, asa unang bongot hita tu paruhumani. Masibetabetaan ma hita manogihon angka donganta rotu parmingguon ai disi do dapot hita angka pangajarion sian Hata ni Debata. Gabe pardame ma hita dohot sira tu saluhut jolma. Dimana orang Kristen Hadir , disima maringan dame, Antong “dibahen I, tadapothon ma marroha na sintong di bagasan hagogok ni haporseaon, dung diurasi rohanta, unang be disolsoli panggora ni roha i hita, jala dung diburi dagingta dohot aek na ias!” (Heber 10: 22) managam ari na balga i. Apostel Johanes di Pangungkaponna: “jadi hubege ma soara na gogo sian habangsa i, na mandok: on do joro ni Debata di taongatonga ni angka jolma; na maringanan ma Ibana di tongatonganasida, jala nasida ma bangsona, jala Debata sandiri saor tu nasida! Jadi apusan ni Debata ma nasa iluilunasida sian matanasida; dang adong be hamatean nang arsak ni roha; nang anggukangguk; nang na hansit; ndang disi be; ai nunga salpu na parjolo i” (Pangk. 21: 3 – 4). Sai manahan hita di haporseaonta managam Ari i, Ari na balga jala Ari las ni roha dohot hasonangan tu angka na manahan ro di ujungna.  Taradotima natau Pauliulihon Tondinta .Marantha ro o Tuhan Amen sai tibu ma ro. Rade Managam Tuhani, Advent : Managam HaroroNa na paduahalihon, Amen