Barita Mardongan Poda

AI SONGONI DOPE PARHALADONTA?

Adong ma sahalak parhalado na tongon laho mangurus siurusonna. Diparkir ma hondana, laho masuk tu jabu ni parjabu. Ndang pola sadia leleng di jabu i, hape dinalaho mulak, nunga dibuat panangko hondana i.

Ala ni na masa i, ditelepon ma tu amanta na karejo di kota na asing. Dungi pintor ditelepon ma tu amanta i ma tu laena, jala laena i pe parhalado do. Adong ma na mandok sabar jala huhut ditangiangkon asa muba roha ni panangkoi. Alai ala ni hormat dohot niar ni laena on marhulahula pintor dibahen do usaha laho manungkun na malo (datu), ingkon urupan do hulahulaniba, nina rohana. Dibahen datui ramalanna, huhut diparade siboanon ni na manungkun i, asa dipaulak panangko i honda i. Adongma siinumon, adong sipispishonon tu alaman, adong si simpanon di ginjang ni pintu. Nungi diboan ma sude na nilehon ni datu i, pintor hatop ma diparidi, dipispishon tu alaman, disimpan diginjang ni pintu. Sudema diulahon na ni dokni datu i, didok rohana asa hatop ditaruhon hondana i, ala didok datu i mulak do i borngin on asal ma naung dibahen hamu na hudok i.

Hamu angka dongan panjaha, asa taida jo: sahalak parhalado magoan honda, dungi donganna parhalado muse manungkun datu. Marlapan do i, parhalado i do na laho tu datu, jala diulahon parhalado i do na nidok ni datu i.

Sega ni na masa i ate dongan? Ai songon i dope haparhaladoonta dipartingkian on? Hape tangkas do hita manjamitahon asa unang mardatu, tu Debata ma mangalualu asa dipatuduhon na dumenggan. Molo holan na manjamitahon do hita, didok ma i angka na paotooto dirina (Jak.1:22). Nunga tangkas anak hatiuron do hita jala ingkon mangolu songon anka anak hatiuron, didok do: Ai na holom do hamu najolo; alai tiur do anggo nuaeng di bagasan Tuhan i: Marparange ma hamu, songon angka anak hatiuron! (Epesus 5:8).

ALA NI LIPSTICK GABE NGANGANG

Tongon di ari natal laho pajojorhon ma angka dakdanak. Didok roha ni sahalak inantama, sahali sataon do songon on, apala tamba uli ni borungkon berengon ni natorop laho pajojorhon, ninna roha ni inanta i.

Bagak ma antong idaon boruna i ai rara bibir ni boruna i.

Alai dung dibahen lipstick i, gabe so pola be mangan boruna i laho tu Gereja. Manghatai pe ndang olo be, sotung mago lipstick i, ninna rohana. Ndung sahat digereja pintor didapothon ma angka donganna ma ibana ala nunga mansai uli asing sian na somal dohot asing sian angka donganna. Sude ma angka donganna i manungkun, ise mambahen i, sian dia dapot hamu i? Alai ndang manghatai be holan diundukhon, ditudu, diupirhon, angka ima alusna tu donganna i.

Sahatma muse tu napajojorhon, laho ma tu jolo rap dohot angka donganna. Dibahen guruna ma abaaba asa mulai pajojorhon. Sian parjolo mansai tangkas do begeon angka sipajojoron i. Alai sahat ma tu dakdanak on, didok do sipajojoranna i, alai ndang tangkas be habegean baliksa hira na ngungu ma begeon. Sai didok ma tu ibana, dokhon sahali nari, gogo jala tangkas dok. Didokhon ma sahali nari alai tong songon i soarana. Gabe tarsonggot ma natorasna, maboha do ulaning borungki? Dung i didapothon ma jala disungkun, boasa songon i ho? Huhut ma ditudu bibirna na marrara i. Hape holan manjaga lipstick i do hape unang sesa, gabe ndang domu be bibirna i manghatai, gabe so tangkas begeon.

Hamua angka dongan! Ndang sude hape na uli idaon gebe ulima sasintongna. Gabe manegaido haulion i gabe so dihatahon be sipajojoronna i dohot denggan, ai nunga holan tu si rohana. Laos parsiajaran ma on di angka natoras, unang holan pauliuli penampilan hita on, alai tauji ma mambahen uli apala roha parbagasan i. Roha parbagasan i do na umporlu, ianggo na tarida on na laho salpu do i sude. Tangkasma tahangoluhon hata i: ianggo jolma rupa do na niidana, alai anggo Jahowa roha di bagasan do na niidana (Samuel 16:7b).

ANAKHU DO HAPE

Somal do di ari natal manang di taon na imbaru, sai mulak angka pangaranto tumopot natorasna asa rap marlas ni roha di taon baru i. Adong ma sahalak dolidoli naung pola lima taon ndang hea mulak, alai anggo na sahali on mulak ma ibana. Nunga sai dipapungupungu hepengna asa adong lehononna tu natorasna dohot tu angka anggina, jala diboan ma angka sipanganon na tabo asa las roha ni natoras dohot angka sisolhotna.

Tongon tar holang do huta nasida sian inganan na ribur jala ingkon mandalani gadugadu ni hauma dope tolhas tu bagas nasida. Ala adong gangguan ni kendaraan  nasida dipardalanan, gabe ingkon borngin ni ari ma ibana sahat, dung i mardalan di naholom ma muse. Didok rohana, sai na hurang tibu sahat asa gira pajumpang dohot natorasna dohot angka sisolhot.

Hape dinaso panagaman, nunga adong sahalak amanta di inganan na holom i holan paimaima halak na lewat. Didok roha ni amanta i, laho jumpang ma ari natal dohot taon baru, hape hepeng so adong. Dongan marlas ni roha, mangllang jagal, manuhor roti dohot minuman, hape keluargangku ndang boi manuhor manang ahaala soadong hepeng. Jadi nunga marsitutu amanta on paimahon halak na lewat, hutodong ma annon asa dapotan hepeng iba, ninna rohana.

Mardalan ma antong dolidoli pangarantoi huhut sorat mamboan angka siboanonna. Dung dibege amanta i adong jolma mardalan, didok rohana ma, on ma ibana, paruntungan ma on. Pintor dipasak ma dolidoli i laos dabu tu hauma i jala pingsan. Dibuat ma sude na binoan ni dolidoli i dohot dompetna na marisi hepengi. Lasma rohana, nunga dapotan ahu, laos mulak ma. Nangetnanget ma amanta on mardalan jala sian pudi ni jabu ma ibana mulak unang adong na umbotosa.

Ndang sadia leleng, sadar ma dolidoli i jala dinunuti ma mardalan sa sahat tu huta. Dung i dituktukma bagas ni natorasnai jala tung las ma roha nasida umbege soarai, ai anakhu do i ninna roha ni natorasna. Dung dibuka pintu pintor marsihaolan ma nasida ala ni sombu ni sihol ni roha. alai tompu ma tarsonggot natorasna i mamereng anakna i ai tung rotak paheanna, bohina, tanganna dohot patna, sudema tahe pamatangna i nunga maraek jala margambo. Laos disungkun ma boasa songoni. Dipatorang anakna i ma na hona samun do ibana jala dibuat do angka na huboan dohot dompethu marisi hepeng. Umbege na masa i tarsonggot ma amanta ihuhut laho tu kamar tumatangis jala manolsoli pangalahonai, ai anakhu do hape na husamuni i.

Hamu dongan! Tung hailaon bolon ma na masa i, ai anakna sandiri disamun. Goarna ma naung dibagas hajahaton, ndang ditandai sisolhot, aleale. Disude partingkian, sai patupaonna do hajahatonna i.

Patut do ulahononna hajahaton i, ai sian diama tagamon adong hepengna, ai so hea mulaulaon, holan na mabuk dohot marjuji do ulaonna ganup ari. Patut do lam tubu angka sangkap na jahat, ai nunga dibagasan hajahaton ngoluna. Patut ma didok: Pasomalsomal ma dirim mangulahon hadaulaton. Matahon dirim, ro di pamodaion i; mian ma ho disi! Ai molo i diula ho, paluaonmu ma dirim ro di angka na tumangihon ho (1 Tim.4:7b,16). Antong hangoluhon ma hata ni Debata, jala sai i ma halomohon arian dohot borngin.

MANSOADAHON UGAMONA

Tongon dibulan puasa mardalani ma dua halak dolidoli tu sada luat laho mangaluli parkarejoan. Disungkuni ma pangisi ni luat i manang na adong karejo sikarejoon nasida. Alai sude mandok ndang adong karejo di luat on. Hape nunga tung loja nasida huhut mauas male jala ndang adong lapo panuhoran sipanganon. Nian adong hian do lapo na boi mangalompa supermi, alai ala tongon bulan puasa gabe tutup do parlapo i ala marugamo silom do sude pangisi ni luat i.

Dungi dibaranihon nasidama manuktuk jabu ni parjabu pinomat inganan mangulon satongkin, ninna roha nasida. Jala burju roha ni parjabu i, laos disuruma nasida masuk. Alai nunga manghatai hian nasida, tadokma ugamonta silom asa diloas hitamarborngin jala dilehon hita mangan di jabu i. Alai nasada tung maralo situtu do rohana mandoadahon ugamona, gabe tung marungkil do panghilalaanna ala ni i.

Disungkun parjabu i ma nasida, sian dia do hamu? Nunga loja hamu ate? Dungi sungkun-sungkun na parpudi, aha do ugamomuna? Pintor hatop do sahalak mangalusi asa pintor las roha ni amanta on, ninna rohana, silom do amang. Alai nasada nari tung so barani do mansoadahon ugamona, tung pe marungkil didok do, molo ahu Kristen do amang.

Dungi didok amanta ima, ala silom do hape ho laho ma ho tu kamar an, di si majolo ho istirahat paima dapot marbungka puasa annon. Tu namandok Kristen i, didok do, laho ma ho tu dapur, adong do sipanganon disi, mangan ma ho jala minum, nunga maus male ho nuaeng. Pintor dialusi na mangaku silom i ma, ahupe mauas male do amang. Alai didok amanta i ma, ai bulan puasa do nuaeng, marpuasa ma ho. Donganmon na Kristen do ibana, jadi ndang marpuasa.

Pintor lam gale ma panghilalaan ni na so barani manghajongjonghon ugamona i, nirimpu do gabe parsaulian hape gabe harugian do. Ue, loakna i, ndang hape soadaon ugamoniba.

Singkop ma na nidok ni turpuk i: Onpe, unang ho maila, mangkatindangkon Tuhanta i, jala unang hailahon ahu, na tarhurung humongkop Ibana; dohot ma ho tahe mangkongkop barita na uli, sian hagogoon ni Debata (2 Tim.1:8). Sai tahatindanghon ma Tuhanta i, baritahon ma di tingki na une dohot di tingki na so une.

NDANG DOHOT DITANGIANGKON

Somal do molo di taon na imbaru sai dipatupa partangiangan keluarga. Di si ma marhata sipodaon, marsisesaan dosa. Songon i ma na masa di sada keluarga, tongon di taon na imbaru mulak do sude gellengna sian pangarantoan. Torop ni gellengna adong do pitu halak, adong ma i naung marhasohotan, jala adong dope naso marhasohotan.

Dung sidung marsisesaan dosa, martangiang ma amantai manangianghon sude gellengna i. Mansai jojor sude goar ni gellengna i ditangianghon  sian na umbalga sahat ro di na ummetmet. Mulai sian anak panggoaran didokma goarna, ditangianghon ma hahipason, pahompu, pansarian asa lam tu dengganna. Sahat tu napaduahon, didokma goarna jala tong ma jojor ditangianghon. Alai pintor mangalangka ma tu anak na paopathon, didok goarna jala jojor ditangianghon haporluonna. Alai anggo anak na patoluhon nunga sungkunsungkun, boasa ndang didok goarhu? Ninna rohana!

Sahat ma muse tu na palimahon, didok goarna jala jojor ditangianghon haporluonna. Laho manangianghon anak na paonomhon Pintor marsoara ma anakna na patoluhon i, ahu dope bapak anakmu na patoluhon, goarhu ndang didok dope bapak, ndang ditangianghon ho ahu. Alai pintor dialusi bapakna i ma, Pasip ma disi, ndang hasea ho, so hea manghirim ho, apala baritam pe so hea dipaboa ho. Ditorushon bapakna i ma manangianghon na paonomhon sahat tu na papituhon.

Aian barita i boi idaonta, sudedo ianakhon hape manghasiholi asa ditangianghon natorasna. Alai ala naung hansit roha ni natorasna i tu anakna na patoluhon i, songonima pambahenanna. Jala sai unang ma masa nasongon i, molo pe tung tarajumi na mambahen dogo nirohanta i, baliksa ingkon tangianghonon do asa muba rohana. Jala ndang boi hansit ni roha bahenon di namartangiang. Ai didok do: Alai molo jongjong hamu martangiang, sai sesa hamu ma, molo adong pangkurangi ni rohamu di halak, anggiat disesa nang amamuna na di banua ginjang i salamuna (Mark 11:25).

SUDE NDANG SANGA

Somal do manjonokhon hari natal, angka natoras manuhor baju baru ni ianakhon, asa bagak di na pajojorhon di gereja. Hinorhon ni baju baru i, tung tamba do las ni roha ni angka dakdanak, jala tamba uli do idaon.

Alai adong ma sahalak ianakhon gabe marsak ala celana panjang na so pas ukuranna. Annon bodari ma marnatal angka dakdanak di sada gereja, jadi nunga ingkon rade hian angka na porlu i di dakdanak. Dimanogot ni ari, diuji dakdanak i ma mamangke celana panjang na i hape tung mansai manganjanghu.

Didapothon ma omakna, paboahon na manganjanghu celana panjang i asa dipotong nian deba. Alai dialusi omakna i ma, annon ma da, adong dope karejongku. Dungi didapothon ma muse ompungna, ompung potong jo celana panjanghon ala manganjanghu. Dialusi ompungna i ma, annon ma da, adong dope ulaonku. Dungi didapothon ma muse kakakna asa dipotong celana panjangna i, hape didok kakakna i ma, satongkinnari ma da asa jolo sidung karejonghu.

Ala ni alus i sude, gabe marsak ma dakdanak i huhut laho tu podoman laos tarpodom. Hape tompu ma diingot angka omakna i celana panjang ni anakna i ingkon potongon. Dipotong ma dungi dijahit muse, laos dilompit denggan. Diingot ompungna i ma muse, dipotong ma jala dijahit muse, dungi dilompit denggan. Diingot kakakna ma muse, dibuat celana i, dipotong laos dijahit jala dilompit denggan.

Sahat ma tu bodari, laho mangarade ma dakdanak i asa borhat tu Gereja, dipangke ma celana panjangna i, hape ndang be tardok celana panjang be , jala dohonon celana pendek, hape manganjanghu. Celana panjang ndang, celana pendek pe ndang. Gabe tangis ma dakdanak i, ala nung maila mamangke celanana i.

Ioma hasesega molo ndang adong be tingki tu ianakhon, naeng marlas ni roha do ibana rap dohot angka donganna hape gabe arsak ni roha do na ro. Didok hata ni Debat do ... Unang gintali hamu angka nakkhonmuna, pagodanggodang hamu na sida di bagasan ajar dohot poda ni Tuhan i (Epesus.6:4).

NDANG SONGONI HIAN

Hira sude do manghatai inanta na sada an, ndang hea senyum, hira na dodongon idaon, holan na hohom. Somalna, maol do antusan hadirion ni na songon i. Panghorhonna, sai torop do jolma paholanghon diri sian i.

Songon i ma pandok ni torop halak tu sahalak inanta na adong di sada luat, sai hira na mansai borat patuduhon engkelna. Di sada tingki laho ma inanta i tumopot gellengna di pangarantoan, pola sahat tu dua bulan lelengna asa mulak.

Dapot ma tingkina, mulak ma inanta i tu huta jala nunga mansai muba be pangalahona. Nunga mura senyum, mura manghatai jala sai ihut do bergerak tanganna molo manghatai. Jala ala pangalaho i, sai sungkunsungkun ma natorop. Naung boha do dibaen gellengna ibana, pola manasai  godang haimbaruon. Na so pola siparengkelan, nunga pintor mengkel; na so pola ingkon mardongan gerakan tangan molo manghatai nunga sai pintor bergerak.

Alai dapot ma muse sialana, patut ma songon i, ai naung mamangke ngingi sere (gigi emas) dohot mamangke tintin sere do hape. Jadi sai senyum pe ibana na patuduhon gigi emasna i do; molo sai bergerak pe tanganna na patuduhon cincin emas na di jarina i do. Saonari gabe didok halak ma muse, singinjang roha, tuit pangalahona, ndang suman be natutua songon i. Aut sura adong mobil ni i ndang dibagasan be i hundul, di tarup ni mobil i nama asa dibereng halak na ibana do nampuna mobil i.

Hamu angka dongan! Porlu do adong hamubaon alai unang gabe tu ginjang ni roha. porlu do adong tanba arta, alai ndang pola sai patudutuduhonnonhon. Baliksa gabe lam toruk ma roha molo lam tamba siadongan, hisaphisap ni danging i do i, sipasidingon do na songon i. Ai didok do: Ai nasa na di portibi on, i ma lomolomo ni roha ni daging, giotgiot ni roha ni mata dohot na manenagnengahon sinaadongan, ndada sian Ama i anggo i, tung sian portibi on do (1 Joh.2:16).